ثقافة التبرع بالدم ردا على غزوة الخميس

اعلن تنظيم ( دولة العراق الاسلامية ) عن مسؤوليته عن التفجيرات التي ضربت بغداد يوم الخميس 22 - 12 - 2011 و اسموها (غزوة الخميس )

اسئلة حيرتني

تنظيم دول العراق الاسلامية لأي درجة مسيطر على الوضع ببغداد بحيث يضرب بكل مناطق بغداد؟

تنظيم دولة العراق الاسلامية يقوم بالتفجيرات لحماية ( السنة ) من المخطط الايراني ، هيئة النزاهة شنو دخلها بالموضوع ؟

تنظيم دولة العراق الاسلامية ضد ايران ، يفجر ببغداد ليش ؟

تنظيم دول العراق الاسلامية ( يعني مو جماعة طارق الهاشمي و لا جماعة نوري المالكي ) من تحرك و نفذ الشرطة و القوات الامنية وين كانوا ؟

قاسم عطا صرح ( لن نتهم جهة معينة بتنفيذ الهجمات و لكن الشعب يعلم تمام من يقف ورائها ) قاسم عطا كان يقصد قادة التظيم لو قادة ( العملية السياسية الخربانة ) !!!

اعلان تنظيم دولة العراق الاسلامية يتناغم ويه تورط 4 ضباط بالتفجيرات لو يتقاطع وياها ؟

اسئلة تواجه تصريحات القتلة القانونيين و القتلة الغير قانونيين

زين هذي التفجيرات بالاساس مشكلة امنية لو سياسية ؟
و اسئلة تجر اسئلة و مقترحات و حلول و لقاءات و الجمهور يتابع
عجبني تفاعل الجمهور العربي ويه موضوع العراق
صفحة قناة الحرة على الفيس بوك سألت عن رأي المتابعين بجراء انتخابات مبكرة كحل للخروج من الازمة
اول جواب من مواطن عربي كان ( العراق بلد حقير هو و شعبه ، ما يفهموه شنو يعني ديمقراطية ) اكيد هذا الجواب ادارة الصفحة حذفته لكن بعد ما قراه الاف المتابعين
في حين باقي الاجوبة اللي معظمها من العراقيين كانت تصب في سيل الطائفية بصورة مبطنة او معلنة ( خوش صورة معكوسة عن العراق بين طائفي و حقير و جاهل ) !!!!
اخواني و اخواتي
الخطر الحقيقي اللي يواجهة شعبنا هو عودة النفس الطائفي و التقسيم السياسي على اساس نوري شيعي و طارق سني
التفجيرات تصير و تنتهي لكن الطائفية ما تخلص
نظرة الجهال من الشعوب العربية تتغير لكن الطائفية ما تتغير
الطائفية ما تترك احد خلفها ، لازم تحرق الاخضر و اليابس

بالنهاية اخص بالذكر النصر الحقيقي للشعب ...
احلى تصريح بالعراق و احلى توحيد للصفوف كان بعيد عن السياسة و عن التنظيم و عن كل التوجهات
احلى تصريح كان لشباب العراق الواعي اللي نفذوا حملة تبرع بالدم ما فرقت بين اي انسان و انسان بهذا البلد و مثل م اختلط دمنا بالموت اختلط دمنا بالحياة :)
شكرا لوعيكم يا شبابنا الابطال ، شكرا لحرصكم على حياتنا و شكرا لحرصكم على وحدتنا و شكرا على كل اللي تبذلوه من جهد لعكس صورتنا الحقيقية و جوهرنا الانساني ، يجوز مقالي ببدايته كان سوداوي لكن انتم مسك ختامه و احلى ما بيه

شكرا لكل وردة شارك و حفز الناس للمشاركة.

الامر الذي يؤدي الى تدمير العالم ليس الاشخاص الذين يعملون الشر و لكن الاشخاص الذي يشاهدوهم و لا يحركون ساكنا

كعكة العراقيين

بمناسبة اعياد الميلاد و احتفالات رأس السنة خبزتلكم السيدة ام اسراء كعكة حتى تتشاركون بيها بكل طوائفكم و قومياتكم 

المكونات :

1.     كوب مسحوق سرقة

2.     ملعقتين احتيال ورشاوي

3.     نصف ملعقة كوب نهب وسلب للمال العام

4.     قليل من عجينة محسوبيات وعمك خالك

5.     كوبين من سائل انفلات امني

6.     حبات من ضحك على الذقون 

تخلط المكونات بواسطة ملعقة السيد رئيس الوزراء ويرجى ارتداء كمامة لتكميم الافواه والاراء..وتوضع في قالب التستر بالدين ..وتشوى بحرارة لهب الصيف معدوم الكهرباء على درجة 50

بعد النضج ... يرجى تبريدها بواسطة مقترح ال100 يوم... ثم يرش على الوجه اطلاقات كاتمة للصوت للتجميل ...... والف عافية لكل عراقي

دين ايام زمان

حلوة ايام الطفولة اللي عشناها

صحيح زوج امنا كان مطيح حظنا ، بس كنا اطفال و ما نهتم بالسياسة

الاطفال ببيتنا من صغرهم يعلموهم الدين ( يعني طريقة عبادة الرب مو يشترون و الفلوس على تالي )

كنت طفل علموني احفظ سورة الفاتحه ، الاخلاص ، الضحى و السور القصار

علموني اتوضأ ، علموني اصلي

و شفت الدين حلو

من كنت صغير سألني واحد من اخواني انت سني لو شيعي اتذكر بوقتها شلون صفنت بوجهة

كان عمري 9 سنوات بوقتها ، كنت اعرف اكو فد شي اسمه شيوعي ( و ما اعرف شنو هو الشيوعي بس هي كلمة سامعها بالراديو ) و ما كنت اعرف اكو فد شي اسمه شيعي ، و اكيد كلمة سني كانت مرتبطه عندي بالضروس مو بغير شي .. انا القشمر رحت على واحد اكبر مني بـ 59 سنة سألته: جدو يعني شنو سني و يعني شنو شيعي؟ اليوم واحد من اخوتي سألني و ما عرفت شنو اجاوبه؟ ما عرفت شنو الجواب اكيد لأن جدو ويه ما كان يقول الجواب اذني كانت تصفر من الراجدي اللي اكلته

من كبرت طلعتلي الاشياء اللي ما تعلمتها عن الدين

فتوى ، رجل دين ، تفسير ، تأويل ، عمامه ، مذهب ، دين ثاني ، كافر ( و هذا الي دائما يقولو عليه )

كبرت و دارت سنة و بعدها سنة و صار اللي صار ، رجعوا اخوتي من الغربة و وياهم صديقهم الاجنبي و خلصونا من زوج امنا ، تعرفون باقي القصة لو لا ؟ اللي ما يعرفها يقرأ ( منو انا ؟ )

صار القتل سهل من تعرف واحد من غير مذهب

صار القتل سهل من تعرف واحد من غير دين

طيب اخوتي و صديقهم خلونا نتقسم بهذا الشكل السخيف

س و ش و ك و ع و م و ص و حمص بطحيني و باباغنوجي و الخ

اليوم بعد كل هذي الفترة عرفت جدو شنو قال و انا ما سمعتهقال ( هذا الموضوع عقرب اصفر اللي يصير بطريقه يقرصه و يسمم عيشته ) الله يرحمك جدو كان المفروض انت تربي اخوتي اللي رجعوا من الغربة

اصدقائي تمسكوا بالدين اللي تعلمتوه بصغركم و لا يغركم كلام اخوتي اللي راجعين من الغربة ويه صديقهم ، يريدون ثروة ابونا ما يريدون الخير النا

منو انا ؟

البيت بي انا و اخواني و خواتي و امي 
ابوي الله يرحمه ترك النا ثروة جبيرة كلش 
اجه واحد مو خوش ادمي و ضحك على امي و تزوجها

زوج امي انسان ظالم و قاسي ، ضربنا، طلعنا انا و اخوتي من المدرسة و احنا صغار ، تعارك ويه جيراننا ، سرق تعبنا و ذهب امنا و ورث ابونا ، جوعنا ، جاب جماعته و اصدقاءه و عيشهم ويانه ، حاول يفرض علينا اراءه و قناعاته.

يوم من الايام واحد من اخوتي سافر انهزم من البيت بسبب القهر ، و بعده الثاني سافر و الثالث سافر كل واحد راح لدولة شكل و عاش مرتاح و متهني هناك

بعد فترة من الوقت اكو واحد من منطقة بعيده سمع بينا و عرف ابويه ترك النا ثروة جبيرة و زوج امنا مستولي عليها و حارمنا منها، قرر هذا الواحد يجمع اخوتي اللي عايشين بالغربة و يتفق ياهم حتى يجون يتخلصون من زوج امنا الظالم و يساعدونا و يرجعولنا حقنا ، بصراحه تشوفوها مو منطقية واحد من بعيد يجي حتى يساعدنا مو !!!

بس تالي صارت صدق و رجعوا اخوتي ويه هذا الغريب اللي جاي من بعيد و قدروا يخلصونا من ظلم زوج امنا، استبشرنا خير و قلنا هذوله اخوتنا عانوا من ظلم زوج امنا و يعرفون الامنا و مصايبنا و يعرفون رغباتنا و امالنا شنو و صديقهم الغريب اللي جاي وياهم متعلم و شكله ابن اوادم و ينصر المظلوم و عايشين فرحانين بوجودهم صار النا كم يوم ..... بس مثل ما تعرفون النهايات السعيدة هي نهايات القصص التي لم تنتهي بعد، فجأة اخوتنا اللي راجعين حتى يخلصونا صاروا طغاة و الطمع تملكهم و صار حكم ثروة ابونا أهم عندهم من دمنا ، واحد قام يذبح بينا على مزاجه بحجة احنا مو من جماعته و اللاخ من كان بالبيت كان مصاحب بنت الجيران راح جاب اهلها و قلهم تعالوا ساعدوني اتخلص من اخوتي و انطيكم نص البيت و واحد اخذ غرفة و قال انا معليه غرفتي بهذ البيت لوحدي و محد يتدخل شلون ارتب بيها و شنو اسوي، صديقهم الغريب ابن الاوادم الحباب طلع ثعلب ماكر و ما جاي حتى ينصرنا ، طلع جاي لمصالحه الشخصية ، الجيران من شافوا بيتنا صار بهذا الشكل صارا يومية مسويلنه مشاكل، كلهم يدورون دفاتر عتيكة على اسا احنا مسؤولين عن افعال زوج امنا العتيق و كل واحد صار يريد ياخذ حصة من البيت، واحد يقطع الماي و واحد يسرق الثروات و واحد يدز ولده يخربون ببيتنا و و و و ، سالفة ما تخلص.

هذا شويه من القصة و اكو هواي تفاصيل ما حبيت اذكرها

زين  هسة تعرفون منو انا

و منو اخوتي

و شنو بيتي 

ملاحظة كلش مهمة انا مو من جماعة زوج امي و ما اترحم عليه