دين ايام زمان

حلوة ايام الطفولة اللي عشناها

صحيح زوج امنا كان مطيح حظنا ، بس كنا اطفال و ما نهتم بالسياسة

الاطفال ببيتنا من صغرهم يعلموهم الدين ( يعني طريقة عبادة الرب مو يشترون و الفلوس على تالي )

كنت طفل علموني احفظ سورة الفاتحه ، الاخلاص ، الضحى و السور القصار

علموني اتوضأ ، علموني اصلي

و شفت الدين حلو

من كنت صغير سألني واحد من اخواني انت سني لو شيعي اتذكر بوقتها شلون صفنت بوجهة

كان عمري 9 سنوات بوقتها ، كنت اعرف اكو فد شي اسمه شيوعي ( و ما اعرف شنو هو الشيوعي بس هي كلمة سامعها بالراديو ) و ما كنت اعرف اكو فد شي اسمه شيعي ، و اكيد كلمة سني كانت مرتبطه عندي بالضروس مو بغير شي .. انا القشمر رحت على واحد اكبر مني بـ 59 سنة سألته: جدو يعني شنو سني و يعني شنو شيعي؟ اليوم واحد من اخوتي سألني و ما عرفت شنو اجاوبه؟ ما عرفت شنو الجواب اكيد لأن جدو ويه ما كان يقول الجواب اذني كانت تصفر من الراجدي اللي اكلته

من كبرت طلعتلي الاشياء اللي ما تعلمتها عن الدين

فتوى ، رجل دين ، تفسير ، تأويل ، عمامه ، مذهب ، دين ثاني ، كافر ( و هذا الي دائما يقولو عليه )

كبرت و دارت سنة و بعدها سنة و صار اللي صار ، رجعوا اخوتي من الغربة و وياهم صديقهم الاجنبي و خلصونا من زوج امنا ، تعرفون باقي القصة لو لا ؟ اللي ما يعرفها يقرأ ( منو انا ؟ )

صار القتل سهل من تعرف واحد من غير مذهب

صار القتل سهل من تعرف واحد من غير دين

طيب اخوتي و صديقهم خلونا نتقسم بهذا الشكل السخيف

س و ش و ك و ع و م و ص و حمص بطحيني و باباغنوجي و الخ

اليوم بعد كل هذي الفترة عرفت جدو شنو قال و انا ما سمعتهقال ( هذا الموضوع عقرب اصفر اللي يصير بطريقه يقرصه و يسمم عيشته ) الله يرحمك جدو كان المفروض انت تربي اخوتي اللي رجعوا من الغربة

اصدقائي تمسكوا بالدين اللي تعلمتوه بصغركم و لا يغركم كلام اخوتي اللي راجعين من الغربة ويه صديقهم ، يريدون ثروة ابونا ما يريدون الخير النا